#ഗുൽമോഹർ

നാല്
ചുവരുകൾ വേണം,
എന്റെ സ്വപ്‌നങ്ങൾ കൊണ്ട്
മേൽക്കൂര തീർത്ത്
നിന്റെ മണം കുത്തി നിറക്കാൻ,
നിന്റെ ചിരി കൊണ്ട്
കോറിയിടുന്നതൊക്കയും
എന്റെ നെഞ്ച് പൊള്ളിക്കണം,
പൊട്ടിയടർന്നു പോയാലും
ഉണങ്ങാതെ നീറണം,
നീയില്ലാതെ പറ്റില്ലെന്ന്
വാശിപിടിക്കുമ്പൊ
ചുവരുകൾക്ക്
തീക്കൊടുത്ത്
എനിക്ക് ഭ്രാന്താണെന്നു
നീയുറക്കെ പറയണം,
കത്തിയടരുന്ന ചാരം
എന്റെ ഭ്രാന്ത് നീയാണെന്ന്
പ്രതിധ്വനിക്കുമ്പോൾ
ഒന്ന് കരഞ്ഞേക്കണം,
അവസാനത്തെ
പുകച്ചുരുളും
കണ്ണിൽ നിന്നും മായും മുന്നേ
നീ
തിരിച്ച് നടക്കണം,
വളവിന്റെ അറ്റത്തെത്തുമ്പൊ
പതുക്കെ തിരിഞ്ഞൊന്നു
ചിരിയടയാളം തീർക്കുക,
ചിതയിൽ ബാക്കിയായ
ചിലതൊക്കെ
പൂമരം തീർക്കാനതു തന്നെ
ധാരാളം,
മടക്കയാത്രയ്ക്ക്
അടയാളങ്ങൾ കരുതുക,
നിന്റെ ചിരിയിലൂടെ മാത്രം
പൂർണ്ണമാകുന്ന
വസന്തങ്ങൾ കാത്തിരിക്കും,
നീ വന്നാലും
വന്നില്ലെങ്കിലും
നിന്നിലൂടെ മാത്രം
പൂർണ്ണത തേടി...

#ഗുൽമോഹർ